Hmawngtlang Le Leitak Buai Nak, A Ruang Bik Theih Ding Mi Pawl

Leitak Vs Hmawngtlang buianak kong theih awk:
————————–
1. Senthang peng ummi Phaipha khuami nih Leitak ram ukbawi Pu Mang Hnin zaangfah an rak nawl i Pu Mang Hnin nih cun a zaangfah hna caah 1942 kum ah Hmawngtlang khua tlaknak nawl a rak pek hna. Dawtnak lungthin in a rak cohlang hna.

2. Hmawngtlang khua cu Zophei ram chung hmunhma a that biknak hmun ah a um i khuadang in minung tampi an lut, milu an karh.Kum 60+ chung ah a hun thangcho ngaingai. Khuapi he zong a naih deuh ngai i siizung le police sakhan hna a um fawn tikah tampi nih cun Leitak nakin khuapi deuh ah hun ruah a si cang.

3. Kan hnu 2012 thawk in Leitak khua 3 nih biachahnak an tuah i khua khat ah i fonh ding timhtuahnak an hun ngei thawk, an khuathar cu Modern Leitak tiah min an pek. Modern Leitak sersiam in myo ngah khawhnak ding an i zuam.

4. An khuathar Modern Leitak cu Hmawngtlang ramri pawngte ah a si. An sak tharmi an inn cheukhat le an khua signboard an tarnak hmun cu Hmawngtlang ramri chung ah a si tiah Hmawngtlang lei nih an chim.

5. Cutikah, Hmawngtlang nih ‘kan ram nan kan chuh, kan ram ah inn sa hlah u’ an ti hna. Cozah sin ah voi tam nawn report an tuah fawn hna. Cozah zong nih Leitak cu ‘Hmawngtlang an vawlei ah inn sa hlah u(cu-caw hlah u)’ an ti hna.

6. Hi ruang ah Leitak an lungfak, ‘kan zaangfak hna i kan inn le kan ram ah kan luhter hna, kan vawlei in kan cawm fawn hna, nain atu cu cawmtu dawtnak an thei ti lo, cawmtu lehlam an kan seh cang, Hmawngtlang tham cu Pu Mang Hnin nih ram a pek tung hna lo, umnak nawl le hmannak nawl lawng pei a pek ko hna cu, a ngaingai ti ah cun atu Hmawngtlang nih kan ram an ti mi vialte cu Leitak ram pei a si ko cu’ an ti ve.

7. Zahan an i velhnak ah kap hnih hliamhma an hmu. Ai velhmi lakah Hmawngtlang mino 50 le Leitak mino 20 hrawng an i tel. Hmawngtlang mino nih an tlun pah ah Leitak khua luhnak signboard an hrawh chih.

Ref:Salai Lungthli Tum