Hakha lamzawh kong ah ho dah upadi a buar?

Hakha lamzawh kong ah ho dah upadi a buar?
================================= ===
Aluancia 31.7.2019, Hakha ah vawlei le ram kong ah lamzawh a si. Vawlei le ram ti mi hi Laimi calawng ah a biapi lo, vawleicung ramkip le miphun kip caah a biapi tuk cio mi thil a si. Zeicatiah vawlei le ram ti mi cu miphun pakhat sinak a langhtertu hmelchunhnak tehte a si.

Lairam cu kan pupa hna nih anmah kut tein a rak derh i anmah tein an ser mi phung (upadi) in a rak i hruai/uk mi miphun pakhat an rak si. Cucaah Lairam thing le ram, lei le lung miphun dang kut cung a phak lo nakding ah kan pupa hna nih fei le nam he nunnak thaap, thisen pek in an rak kilven i an rak humhak.

Kan pupa chan ah cun vawlei/ram hi laksawng ah siseh, ro ah siseh an rak i pe i an i roh tawn mi phung a si i a cawk zong an rak i cawk tawn phung a si. Cucaah nihin tiang an pupa chan in ro ah siseh, laksawng ah siseh, a cawk in siseh vawlei le ram a ngei mi tam pi an um.

A pu/pa nih ro a roh mi cu mizei hmanh nih na ta a si lo ti khawh a si lo. Cu bantuk in a cawk mi vawlei/ram siseh laksawng an pek mi siseh na ta a si lo tiah a ho hmanh nih ti khawh a si lo. Cucaah mi ta a si mi hman kan duh ahcun kan hal/cawk hna a hau. Cozah nih project pakhat caah hman a herh ahcun a ngeitu kha a hal hmasat ve ding a si i liam ding a si mi kha cozah nih a liamh hnu ah vawlei le ram cu a hman ding a si.

Cucu atu i vawlei chuhnak upadi ningcang a si. Cozah nih a ngeitu hal loin le liamh loin a duh poh in mi ram vawlei a chuh i a hman ahcun cu bantuk cozah cu upadi a buar mi le nuhrin covo a buar tu cozah a si. Atu Hakha ahcun pupa ram ngei pawl kha cozah nih upadi nan buar an ti hna.

A ngaingai ahcun cozah tu hi upadi buartu an rak si deuh, a buar hmasatu zong an si rih. Hihi keimah catialtu nih cozah sual ka phawt hna a si lo upadi tu nih sual a phawt hna tu khi a si. Zeicatiah vawlei chuhnak upadi nih cun”Cozah nih project pakhatkhat caah vawlei a chuh duh ahcun vawlei ngeitu kha a ram chung luhnak nawl a hal hmasa lai i a ngeitu nih nawl a pek lawng ah a lut lai, a ngeitu nih a duh lo ahcun a lut lai lo” a ti.

Cun “a ngeitu kha a ton lai i a ngeitu hnatlak hnu ah liamh ding mi a liamh lai i cu hnu lawng ah cozah nih vawlei cu a hman lai a ti. Nihin Chin ramkulh cozah cawngcangh ning cu a hohmanh nih sual an phawt hna le hna lo zong ah, a ho hmanh nih thiam an coh hna le hna lo zong ah upadi nih sual phawt cia an si cang. Zeicatiah ram ngeitu an tong bal hna hna lo, na lo chung ah kan lut kho hnga maw ti zong an ti bal hna lo, liamh ding zong fang khat hmanh an liamh bal hna lo. Amah belte a chuh tu cu an chuh thluahmah hna.

Cozah timi cu mipi aiawh in mipi phaisa thlahlawh pek in mipi hi upadi ning in rak kan hruai uh tiah rian khinh mi an si. Mipi hi an kut tang ah an duh poh in rak kan tuah uh tiah nawl pek mi le nawl ngei tu an si lo. Cucaah upadi ning in an ka hruai lo i mipi lung a tlin lo ahcun taza cuai khawh, a rian phuah khawh, duhlonak langh hnawh khawh a si. Zeicatiah “Nawlngeihnak cu mipi sin in a ra mi a si”.
Ref:Salai Bjmin